Episode Four

人到中年，做咗咁多年人，心裡面總會有過啲大大小小嘅傷囗。時間過去，傷口结疤，當我們都以為自己早已從受傷當中康復過來時，其實這些陳年嘅舊傷口，還在背後發揮著影響力，隱隱地影響著我們的行為和決定。

*****

「我真係有一刻，奢望你囝囝會為你哋兩個嘅婚姻帶嚟些少曙光的。」我大囗地喝下那杯啤酒：「唔該，要多一杯。」

「挑，你都識講啦，"奢望"吖嘛。」Kelvin嘆了口大氣：「我份人好現實的，從day1知道Iris大肚開始，就知道會有今日。我從來都冇懷疑過。囝囝出現，只係將時間稍微推遲咁解。」

「明白，只係我諗唔明，Iris究竟做過啲乜嘢咁令你反感，要你非離開不可？」我説：「唔熟你嘅話，肯定以為你有第三者。」

聽罷，Kelvin忽然大笑起來。

「老友，你講得一啲都冇錯呀！」Kelvin也大口地喝了一口酒：「Iris早就一口咬定我有第三者囉，你話我呢個老婆，有幾咁了解我呢...」

*****

大學時候嘅Kelvin, 係個超級好好先生。我認識佢嘅時候，佢有一個喺中學就開始拍拖嘅女朋友Selina。呢個Selina嘛，勉強都算係個靚女的，不過個為人呢，我就覺得幾麻麻地了。脾氣唔好不特止，仲成日駛到Kelvin好盡，管接管送擔擔抬抬仲要呼呼喝喝，總之當佢係工人多過係男友。我咃成班大學同學仔，個個都唔多睇得過眼，成日都「苦口婆心」咁勸佢，呢啲女，早飛早著啦。

「你哋唔好咁話佢啦..」Kelvin總係咁樣答：「Selina只係講嘢直啲遮...」

「挑那星你自己呃自己啦！」我哋呢班損友其中一個答説：「講嘢"『直』同『刻薄』係有好根本嘅分別架仆街！你老母係咪前世未見過女人呀，硬係要攬住呢條臭四！」

「都話叫你哋班友咪咁咯！」Kelvin老沒好風氣地回答：「Selina佢有其他男仔溝佢佢都唔受溝呀，有啲條件仲好好添，靚仔過我又有米過我呀，咁佢都仲肯同我一齊，都算係咁啦，仲想點？」

「你瞓醒未呀白癡仔！」損友又忍唔住了：「佢話有有錢仔溝你又信！佢話美國總統溝佢都得架啦！『講』之嘛！挑，你話我把口臭我都係咁話，以佢咁嘅質素，真係有錢仔嘅，就唔會睇得上眼啦下話...」

「嗱，你班友講嘢唔好太過份呀吓...」Kelvin有點發火了：「咪以為我唔會開你拖...」

「得得得…」損友答得悔氣：「大哥你想死莫非我哋會唔俾你死咩。」

類似這些同學之間的conversation，幾年的大學生活裡，我是見證過許多次了。損友也許真是有點口賤，但他所講有關Selina的，我是打從心底裡面認同的。一來我哋都唔相信，班有錢仔會睇得上Selina，二來，我地都堅信，以Selina份人，如果真係有個發雞盲嘅有錢仔肯埋身，佢肯定會九秒九咁仆到過去啦，仲邊得閒留響Kelvin身邊扮晒不離不棄？

讀大學嘅時候，總有啲招搖過市嘅有米同學仔，會臭串地揸住架由老豆俾錢嘅名貴跑車出入校園的。也許都是酸葡萄吧，在我哋嘅眼裡面，畫面總是咁樣的：名貴跑車𥚃面，司機位上總是坐住個面目可憎嘅樣衰死肥仔，而肥仔身邊，則永遠坐住一個女神級數靚女同學的...而質素卻肯定是比Selina高出好幾班的。

Selina被我哋呢班毫冇口德嘅同學仔響背後足足鬧咗四年，直到畢業前嗰一年，Selina真係出軌了。有一日阿杰響街上撞到Selina真係拖住一個有啲樣衰嘅肥仔。Selina大概都知道，自己被阿杰睇到了，速速甩開肥仔隻手。

阿杰喺我哋呢班同學仔當中，算是最有口得嘅一個了。阿杰響「撞破」咗Selina之後，走來跟我商量，問我係咪要如實咁話俾Kelvin知。老老實實，我睇唔順眼Selina呢條八婆好多年了，俾我哋捉到你嘅痛腳，幼稚的我，當然決定第一時間去告佢一狀。

當日晚上，阿杰跟我一齊走到去Kelvin嘅宿舍，打算「爆Selina大鑊」。冇諗到嘅，係Selina早已比阿杰同我快一步，向Kelvin「自首」了。我哋到達宿舍的時候，Kelvin已經被人率先拋棄了。

「我一早都講，Selina唔係你地講到咁差冇人溝㗎啦！」呢個時候Kelvin仲響度幫緊Selina講開說話，而說話既時候，Kelvin兩眼係泛著淚光的：「嗰條肥仔，揸寶馬㗎。」

呢個係我所見過，Kelvin最難堪嘅一次。

後來Kelvin響畢業搵到錢之後，就無啦啦多咗舖買車換車癮。每隔幾個月，佢就換新車，但換來換去，都係寶馬。由一個型號換另一個型號，由一個顏色又換另一顏色…我其實覺得近乎有啲病態，而我倒從來沒有開口問過，到底這是否因為當日那個肥仔嘅原故。

*****

「其實Iris真係冇特別做過啲乜嘢，令我覺得好反感的。」Kelvin望著酒杯：「你可以話係我問題吖，係我嘅錯吧。但我由第一日同Iris拍拖開始，我就覺得，其實我唔係真係咁鍾意佢的。」

「很仆街吧？你一定係想鬧x我：『唔鍾意人又同人結婚生仔？』啦？」Kelvin苦笑：「唔係個個好似你咁好彩，細細個就搵到個"the one"過人世呀老友。」

我好彩，我當然知道。但Kelvin同Iris既問題，我老早就提醒過佢了。只係我有我提，佢有佢唔理，到後來佢忽然話我知佢同Iris打算結婚，咁我又只好祝佢幸福快樂永結同心。做friend既，要講既都講咗，仲可以點？

俾Selina飛咗之後，Kelvin斷斷續續同個幾個女仔拍過拖。Kelvin畢業後搵到份好工，收入高，自然多女埋身。唔知係咪我錯覺，包括Iris在內，佢啲女朋友，我總係覺得，對Kelvin有一份「崇拜」既感覺。以前佢同Selina拍拖嗰陣，關係係非常之唔對等，女尊男卑既情況係好嚴重的。但佢之後既呢幾段感情，情況就好似嚟咗個大逆轉咁，男既佔晒上風，而且一直去到Iris之前既幾個女朋友，都係俾Kelvin主動拋棄的。

「其實我都奇怪…」我問：「當日我都唔覺得你特別好鍾意Iris的，最後點解你會同佢結婚？」

「唔係呃你…」Kelvin嘆了口氣：「當日其實係佢向我求婚的。」

這個我倒真的沒有想過。

「你知Iris比我同你年紀大歲幾架可？」Kelvin說：「佢同我求婚嗰日，正正係佢廿九歲生日。佢話自己好快就三字頭，大限將至，青春已經走到盡頭…而且好想生個小朋友。」

「我嗰日好忙，連佢生日我都唔記得咗，咩禮物都冇準備…」Kelvin又喝了一口酒：「於是佢問，可唔可以應承同佢結婚，當係送俾佢既生日禮物。」

「就係咁你就應承咗？一世㗎喎哥仔…」我說：「會害死人架。」

「妖，我衣家咪知囉！」Kelvin做了反白了眼的表情：「佢問我嗰陣，佢對眼谷住幾大泡眼淚呀…我嗰一刻，淨係覺得，呢個女仔好可憐，好想好想幫佢同保護佢。嗰一刻，我係真心覺得佢好attractive架。」

「我應承完佢，第二朝瞓醒，已經即刻覺得有啲後悔啦。」Kelvin表情有點無奈：「但起身嘅時候，見到Iris瞓響自己身邊，好似瞓得好甜咁樣，我又諗，不如試吓啦，可能最後會ok呢？」

試吓？!

「終於試咗幾年，都係覺得唔得。」Kelvin苦笑：「Feel既嘢，冇就係冇。我呃唔到自己。」

對於佢地兩個既故事，我一時間唔懂得comment。但我聽完Kelvin既自白，我總係有點不由自主地覺得，Iris當日多多少少係耍咗一點手段，氹Kelvin落搭應承同佢結婚的。及後佢地婚姻出現問題，Iris又再想以「生仔」既方法去挽救，我覺得同樣都係手段，道理上講唔過的。但呢幾年，我倒見證過Iris好努力咁嘗試迎合Kelvin，希望做一個大方得體既好老婆。可以肯定，佢係非常重視呢段婚姻，亦非常在乎Kelvin。諗到呢度，就連我都覺得，Iris真係好可憐。

Kelvin終於搬走咗，正式開始分居既生活。至於囝囝，仍然繼續同Iris一同居住。Kelvin每個星期，都會抽幾日返去Iris屋企，同個仔相處一下。等到個仔瞓咗之後，先至靜靜咁離開。

「呢個安排…當然係temporary啦。」Kelvin跟我說：「long term會點處理？我真係唔知道。」

最可憐的，其實還是個孩子。

Click here to add CK on your Facebook

Episode Three

中國人習慣將結婚同生仔當成一件喜事咁去慶祝，我諗，好大程度上係因為呢兩件事係同「傳宗接代」有住直接既關係。以動物既角度去睇，一個物種在地球上生存，最大既「責任」也許正正是「繁殖後代」，於是結婚同生仔，怎麼不會是件喜事？

但時代唔同了，結婚同生仔，同「喜事」兩個字仲係咪可以劃上一個必然既等號？這兩件事，其實我都做了。至於「點解」會做，當然每個人既原因都唔同，但我對此既體會，係覺得呢兩件事既本質其實都只係「中性」，沒有所謂「喜」與「悲」，又或者「好」與「壞」之分。兩件事所代表住既，就只係「轉變」，而且這個轉變，係屬於「翻天覆地」既級別的。

至於這個關乎人生的「轉變」，到頭來是好是壞，是喜是悲，其實還是依賴兩個當事人用怎樣的態度去處理。

*****

人呢，大部份都係害怕轉變的，特別係當生活過得尚算滿意嘅時候。

那天探過Kelvin同Iris既BB之後，心穎同我協議，有關生仔既事，結婚頭兩年都係唔好諗住。一來當係過下二人世界，二來，我既生意其實還是時好時壞，而且還在發展階段，事業對我時間上既需索，仍然非常之大。所以我地兩個既conclusion係，呢個時候生仔，timing肯定唔係最好。我其實知道，世上並冇所謂真正既perfect timing，假若有的話，也只係人為地製造出嚟，不過既然我地兩個可以come to conculsion呢兩年都唔好諗，我當然樂意繼續保持「遲啲先算」既態度。

快樂既時光總係過得快，我結婚，好快就一年了。心穎係個好識做並且稱職既老婆，第一年既婚姻生活，我係過得非常愉快的。我本來以為，我地兩個拍咗咁多年拖，早就變得「老夫老妻」了，所以結婚之後，感覺應該差別不大。但原來唔係：做人「男朋友」，跟做人「老公」，感覺上總係有一點講唔出係乜既差別…同一個女仔「拍拖」，跟同一個女仔「擁有一個家庭」，響冇兒女既情況底下，實際上可能分別不大，只係感覺上，總係覺得有啲唔一樣。

婚後既生活冇錯係開心，但係開心最容易帶來安逸。我越覺得開心，我其實越唔想有轉變…我明明家陣過得咁happy，他朝生個細路出嚟，咪破壞晒依家既幸福生活？搏唔過吖下話？

當然，呢個世界上唔係個個都係咁諗的…特別係精通評論各人人生既三姑六婆。

當年我同心穎畢業後冇耐，身邊啲三姑六婆就已經不斷催我哋快啲結婚。我嗰陣心諗，你班友都傻嘅，結婚唔洗錢牙？啱啱先畢業出嚟搵食，邊有本事夠錢結婚呀？到時我擺酒係咪你幫我埋單？三姑六婆梗係睬你都傻，佢地一生人最大既「責任」，就係響你身邊不停講啲唔需要負責任既說話，不斷咁俾壓力你，然之後等待睇你仆街。冇錯我同心穎拍拖既時間係長，但係拍得耐係咪等於就要結婚？嗰陣，呢班蛋散講到我咁耐都唔肯娶心穎過門，肯定係有「景轟」，又話我可能有第三者又乜又物，睇得TVB太多真係「想像力」都零舍高人一等。

好啦，我終於結咗婚啦，佢地好快又開始問：「點解你哋仲唔生仔呀？」你點答其實都係嘥氣的，因為佢地總會諗到一啲「有故仔講」既答案，讓佢地可以響自己既八婆圈子裡面互相流傳。關於點解我地冇細路仔既原因，我倒聽過幾個不同既版本，包括話我老婆冇得生（佢地仲天才到用呢個原因，引證咗當日我點解「考慮」咗咁耐先肯娶佢過門…）；又聽過話我地夫妻感情唔好，所以可能一直都冇行埋（我懷疑佢平日梗係瞓響我床下底）；當然我出軌既猜測亦絕不可少…佢地話，我時不時都要返大陸做嘢，我大可以響上面搵到個人幫我生…諸如此類。

呢類廢話，其實由細聽到大，慣咗了，還是笑下就算。

當年結婚呢，屋企人算係冇俾過咩壓力我，不過我明白兩老其實想抱孫，結婚半年之後，阿爸阿媽就開始零零星星地暗示，希望我快啲幫米家添返個丁。

有晚我同心穎返咗阿媽屋企食飯，老豆拎咗兩罐啤酒，鬼鬼鼠鼠咁拉咗我落樓下公園吹水。我知道，佢又想問我有關生仔既計劃了。

「到底你地兩個邊個唔想生呢？」老豆喝了口啤酒，點了根煙。

「生？你食咁多煙，我點敢生呀？」我說：「唔通帶住個大肚婆嚟你屋企食你啲二手煙牙？」

「你多x餘啦，你地真係生既話，我最多咪戒煙囉。」老豆說：「你老實答我啦，係咪阿新抱仔唔想生呀？」

「係咪真係要我老實答先？」老人家心急想抱孫，當願望落空既時候，心理上總會不自覺將責任推落去新抱身上。我其實以前都同佢地講過，係我地兩個想過一陣二人世界既生活先，不過呢啲唔多啱聽既說話，必定係左耳入，右耳出架啦。我響度諗，我可以點講，先唔會令到老婆唔會被誤會？

「兩仔爺，梗係老實啦。」老豆說。

「唉，拿，查實我都唔想講架啦。講起就尷尬…」我故意嘆了口大氣：「其實唔生呢，唔關老婆既事，係我既問題…唔知係咪做生意壓力太大呢，近呢幾個月，我其實都好似唔係好得咁。」

「唔得？咩嘢唔得呀？」老豆好像被嚇到了，我知我那個大話可能真的會成功。

「總之由朝到晚嗰度都好似『軟lai lai』咁，都唔知點解。以前都唔會既…」我又嘆了口大氣：「呢排做嘢太忙，冇時間睇醫生，遲吓會處理架啦。」

「挑，你講真定假呀？」老豆放下啤酒罐：「有病就拿拿臨睇醫生啦，係咪怕醜呀？咁大個人唔好畏疾忌醫喎！最多我陪你去…」

「得得得…你陪我去我仲怕醜…」

回家既路上，我跟心穎講咗剛才跟老豆既對話。

「你把口有冇再衰啲呀？」心穎跟我說：「咁你都講得出？你嚇死你阿爸呀。」

「唉，是但啦。」我笑了笑：「難得佢真係信嘛。講真，如果我唔係咁講，佢地真係以為係你呢個新抱唔肯生，搞到佢地冇孫抱就唔好啦。佢地兩老份人係冇乜嘢，不過始終唔想你地之間有啲無謂誤會啦。婆媳嘅嘢，一不留神就好容易『賴嘢』呀。」

「OK，我知你為我好，但你呢個大話呢，真係吹得太過份啦。」心穎說：「講真，你同你阿爸講，你嗰度最近唔得，佢咪一樣可以入我數？要誤會既，始終都會誤會架。」

Well，其實心穎都講得冇錯既。

我拖住心穎，覺得她的手有點燙。

「老婆，你隻手好熱喎…」我摸了摸心穎的額頭：「有冇發燒？」

「應該冇。」心穎搖了搖頭：「呢排時不時都係咁，遲吓返工冇咁忙嗰陣，或者搵個中醫調理吓啦…」

「其實係咪做我老婆好辛苦呢？」我苦笑：「最近你面色都麻麻地，仲好似瘦咗添喎。」

「唔係『好似』，係真係瘦咗呀。我早兩日上磅，我仲輕過年半前結婚嗰陣幾磅呀。」心穎說：「不過放心，唔關你事的。你呢個少爺仔，都唔算好難服侍，係我返工忙得滯遮。」

我點了點頭。結婚後不久，心穎公司來了個新嚟既頂頭上司，據說是個中年女人。我知我咁講好似有點歧視，但我從來都認為，作為上司，女上司一般都比男上司更難服侍。這個新來的上司，好像還是單身，沒有家庭的。自此之後，心穎返工既時間，就變得越來越長，而且夜晚放了工，電話還是響個不停。響香港地，變態既老細總係梗有一個響左近。

*****

細路仔既一年，感覺係好漫長的。我諗，原因係響細路仔既世界裡面，發生既事情唔多，人生既變化亦唔大，日復日咁過，都唔覺得有咩大轉變，所以年頭同年尾，感覺上往往分別不大，導致有個錯覺，時間好似停留咗響某一點冇郁過咁。

成年人既一年，可以有無限既轉變。拍拖、失戀、轉工、買樓、結婚、離婚、生仔…人到咗某個年紀之後，這些事情就響身邊不斷發生，忙過不停。到年尾既時候望翻轉頭，往往會好驚訝，過去一年響自己既身上，竟然可以發生咁多事情。

這一年，最討厭細路既Kelvin竟然做了爸爸。一年過後，Kelvin同我講咗兩句讓我印象深刻既說話：

「橋，原來我冇自己想像中咁討厭細路仔的。」

「雖然我好鍾意自己個仔，但係佢都係冇能力去挽救一段婚姻的。」

電話響起，傳來Kelvin既聲音。

「橋，我終於都係搬走咗啦。聽晚約出嚟飲杯嘢，好冇？」

Click here to add CK on your Facebook

Episode Two

聽過有啲Auntie輩講，如果兩夫妻婚姻出現咗問題，最好既挽救方法，就係拿拿臨搞大個肚，生個BB出嚟。BB出世之後，兩個大人自不然會因為照顧呢個BB，而忙到不可開交。大家既focus，亦自然地會轉移去到個細路仔既身上。兩個人既focus改變咗，意味住之前彼此之間既恩恩怨怨，亦要焗住放低。照顧細路仔係一件得閒死唔得閒病嘅事，大家將會忙到連交都唔得閒嗌…如是者，婚姻就係咁樣被救返囉。

我唔知呢個係乜嘢邏輯，但我做咗咁多年人，響我既記憶裡面，我係從來都冇見過，一段婚姻會因為一個孩子既出世，而被「真正」地挽救回來。或者，能夠表面上保持住夫妻之名既關係，倒係有既，但我見過更多既情況係，婚姻不但止冇被挽救，而且情況卻係因為多了一個孩子，讓問題變得更複雜，更難解決…而那段婚姻，則變得更加破碎。

細路仔，唔應該咁樣被人利用的。

*****

響Iris既產科病房裡面，除咗撞見佢同Kelvin既一班同事之外，還有一個人…一個我冇見好耐既老友。

「杰！」我把了一把這個老朋友嘅肩膀：「衰仔…我兩年冇見過你啦，終於捨得蒲頭拿？」

「橋，好耐冇見。」阿杰也跟我身旁嘅心穎打了個招呼：「心穎，好耐冇…oops，應該改口做米太先啱。」

「真係唔好意思，連你哋結婚擺酒我都嚟唔到…」阿杰說得有點尷尬：「遲啲補返份人情過你地。」

「妖，得啦。咁耐老友，明架啦。」我說：「你老婆呢？」

「哥仔，星期六呀今日。」阿杰老沒好氣地說：「佢梗係去咗外母嗰邊湊返個仔啦。」

阿杰同Kelvin，都係讀大學時認識既好朋友。畢業之後，我地三個都第一時間回流咗番嚟香港搵工做。有好一段時間，我地三個係成日出嚟飲酒吹水的。後來Kelvin搵到份忙到核爆既投資銀行工，阿杰就入咗Big4做Audit，之後能夠約到佢地見面既時間，就變得越嚟越少。

我地三個舊同學當中，阿杰最早結婚，亦最早有小朋友。自從兩年幾前，阿杰個囝囝出咗世，響醫院探過佢同佢老婆之後，我就一直再冇見過佢，直至今日。Well，呢兩年間，我同佢都有零零星星咁通過吓電話，叫做知道佢一啲近況，不過兩年都抽唔到幾日見個面，真係有啲那過。

「阿橋、Kelvin…我真係唔想架。」這個時候，Kelvin也走了過來：「我真係行唔開呀，查實我都不知幾想可以有時間搵你哋兩個出嚟吹吓水，唉。」

心穎見我們三個老友難得聚埋一齊，便識趣地行開了：「你地慢慢傾，我過去睇BB。」

阿杰既情況，我多少算是理解的。做audit，成日都返上大陸，而且工作時間長到嚇死人，這些我們都知道的。但阿杰既情況，比一啲年輕既auditor更加困擾。我哋三個大學同學當中，阿杰應該係最乖仔，做人最有計劃既一個。阿杰既老婆Mandy，同樣係我地既大學同學，畢業不久，佢地兩個就已經拉埋天窗了。按照阿杰自己所訂下來既「人生路線圖」呢，結婚三年左右吧，就應該要生BB了。結果呢，阿杰同Mandy又再度「達標」，兩年前，佢哋既囝囝就一如所願地出世了。

我唔知道，人生到底有幾多嘢係可以預早計劃的，但我估，當阿杰同Mandy結婚既時候，應該冇預計過，生完BB之後既家庭生活，係會變成咁樣的。由於阿杰同Mandy都係auditor，工作時間長得要死，佢地根本就唔會有時間照顧個BB。本來可以請個外傭解決問題，但係佢地兩公婆響屋企既時間實在太少，以佢地謹慎小心既性格，根本就唔會放心自己個BB，響無自己人監督既情況之下，長時間由外傭照顧的。

結果，阿杰選擇信賴外母大人，而剛剛抱孫既呢位新手婆婆，亦樂於接受呢份差事。

起初既日子，阿杰既外母係會每朝早上，從老遠搭車嚟到阿杰同Mandy既屋企，湊走BB返自己屋企的。到晚上阿杰同Mandy放工既時候，佢哋是但一個就會上外母屋企，將BB湊返自己屋企瞓。佢地最初以為，咁樣既生活唔會有咩問題的，但只係過咗一個月左右，佢外母既體力就開始有啲頂唔順了。外母畢竟年紀唔細，要佢每朝早響阿杰兩公婆返工之前，由九龍城搭車去到上環接走個BB，其實都幾辛苦的。而去到夜晚呢，又要等阿杰同Mandy收工，接返個仔走先至可以休息…慘就慘在，阿杰同Mandy既收工時間係從來無準的。收十一、二點既情況時不時都會發生，佢地呢個安排，外母固然辛苦、阿杰同Mandy兩公婆又辛苦，連個BB其實都辛苦。

於是阿杰最後做咗個決定，就係逢星期一到星期五，BB索性住響外母屋企，去到weekend，阿杰同Mandy先去接返個仔到自己既屋企住，星期日晚飯之後，又送返個仔去外母嗰邊。

「阿杰哥…」Kelvin老沒好氣地說：「你個仔家陣兩歲幾啦喎，你個arrangement都仲係咁？」

「冇法架喎。」阿杰無奈地說：「睇吓Mandy或者我有冇幾會轉份in-house既工啦，轉到既話，時間好啲，先可以接返個仔返屋企住。唉，不過即使係咁，到時又有另一啲麻煩嘢要處理。」

「點解？」我問。

「唉，個仔一直都同婆婆住嘛。」阿杰搖了搖頭：「佢依家好黐婆婆架，老實講，每次weekend我地去接走佢，佢都喊到死去活來咁。老實講，婆婆對佢嚟講，係最親既人，反而Mandy同我嘛…其實好似一個街外既uncle同auntie咁。」

「oh…」我跟Kelvin交換了一個眼神：「咁Mandy有冇因為咁樣唔開心？」

「梗係有啦，都不知因為咁喊過幾多次啦。」阿杰說得很無奈：「莫講話Mandy係女人，即使係我，自己個仔衣家好似當自己係個街外人咁，我個心都好唔舒服啦。細路仔既嘢，冇得呃既，邊個spend得時間多俾佢，邊個就同佢親。乜嘢『血濃於水』呀、乜嘢『佢似終係你親生仔』呀諸如此類既說話，其實全部都係廢話。」

「所以呢，其實真係唔係唔想出嚟搵你哋囉，但實情係，Mandy同我都要爭取僅有既工餘時間，一分一秒都唔想放過，去多啲同囝囝相處。」

「嘩，咁你今日肯特登過嚟睇下我個BB，皇恩浩蕩呀，我真係覺得自己好大面囉…」Kelvin講笑。

「哼，係呀老細…」阿杰笑了笑：「不過實情係你呢間醫院好近我外母屋企，所以我先可以蛇過嚟見吓你哋咋。」

「妖，都知你冇咁好死。」Kelvin說：「快啲轉工啦，你哋繼續係咁，唔得掂呀。」

「Mandy其實已經搵緊工，我估佢應該會搵得到既，我諗咁既生活都係忍多一陣架遮…」阿杰說：「不過到時接返囝囝返屋企住，都擔心佢會唔會唔適應『跟返我哋』既生活呀。」

「唔適應都要適應架啦！」Kelvin忍唔住插咀：「你地始終先係佢地老竇老母丫嘛！細路仔適應能力好強既，唔驚唔驚！」

「我哋都係咁諗…」阿杰點了點頭：「不過陣痛就難免囉。另一個麻煩，係外母。個孫跟佢住咗咁耐，簡直係佢命根一樣。你依家話要接走佢返自己屋企住喎，佢一時間冇晒寄托，都唔知會有咩事發生呀。」

我心諗，係喎，呢層都真係冇諗過。

但如果俾著係我，我或者會選擇搬屋…搬近啲外母屋企；又或者，氹外母大人搬近啲自己屋企囉，到時處理既方法就應該相對可以flexible一啲。不過，每個人想法都唔一樣，一家唔知一家事，有啲嘢真係好難講的。

「咁仲生唔生添呀你地？」Kelvin打了一下阿杰：「我記得你以前話個plan係，一生就要生夠兩個架喎。」

「挑！」阿杰說：「咪玩啦你。生一個我都搞成咁啦，再生多件出嚟，我點handle呀？你同Iris生多個就得！」

我望了一望Kelvin，好明顯，阿杰對Kelvin同Iris之間既事，應該仲係一無所知的。

*****

見到呢兩個好熟既朋友，先後做咗爸爸，感覺好奇怪。

先係一向對小孩子都避之則吉既Kelvin，響半推半就既情況之下做咗老竇；再嚟見返兩年冇見，凡事都計劃周長既阿杰，儘管一如計劃地生咗個BB出嚟，但卻搞亂晒自己既生活；生BB，其實真係可以好大鑊。

離開醫院，揸車返屋企既時候，我還是不斷地諗住我呢兩個朋友。

「冇乜事嘛老公？」心穎見我一直沒有出聲：「咁靜既？有嘢諗唔通？」

「見完呢兩個朋友之後…」我嘆了一口大氣：「忽然覺得，我好唔想有小朋友。」

說罷這句話，大家都靜了下來。

我覺得也許自己是講錯了一些說話吧，同時我也記起，輔導課程當日，心穎是站在那個『八』的旁邊的。

「我都係隨便講吓架咋，唔好當真…」我拿拿臨準備打個完場：「生仔呢樣嘢呢，最緊要老婆開心。我其實冇乜所謂的，你可以話事的。」

「老公，第二樣嘢你俾我話事就得…」心穎也嘆了口大氣：「不過呢樣嘢，一定唔可以淨係由我話事呀。」

我點了點頭，我也當然明白心穎意思。只是這兩個朋友的故事，也真的與我距離太近了。

我才剛結婚，而且還年輕…有些事情，大概應該毋須即時決定的…我諗。

Click here to add CK on your Facebook

Episode One

我有一個小觀察：在我認識嘅朋友裡面，婚姻出現問題既時間，好大部份係響，佢地既第一個孩子出世之後既一至兩年左右。比較合理既推斷係，孩子既出現，令佢地既生活出現咗好大嘅變化，亦讓好多從來冇諗過既問題浮現咗出嚟。

每次有朋友添丁，我哋總會以一件喜事既姿態去對待呢件事。但年紀越大，見到事實既真相亦越來越多。有時會悲觀地諗，當一個孩子呱呱落地之時，其實會唔會就代表住一對夫妻婚姻破裂既開始？我地送上既祝福，最後會否演變成為詛咒？

*****

「前面街口轉左入醫院停車場呀。」心穎拍了我一下：「老公，你冇乜事嘛？成個朝早都好似心不在焉咁。揸車發夢好危險呀。」

「Sorry呀老婆…」我回一回神，差一點就miss了駛入醫院的路口：「可能尋晚瞓得唔好吧。話時話，你有房number嗎？」

「有。Iris send咗SMS俾我。」心穎說：「希望唔好撞正餵奶時間就好，唔係陣間有排等。」

那個強制性婚姻輔導課程之後的三個月，因為要搞婚禮，心穎跟我都忙過不停。最後我哋既婚禮總算順利進行，無風無浪，多得我地雙方家長都屬於容易話圍既人，整個過程，嘻嘻哈哈的就過了。旅行渡過蜜月之後，還未好好適應時差，回來做既第一件事，就係去醫院探Kelvin同Iris剛出世嘅BB。

Kelvin係我大學同學，比我早兩年結婚。佢結婚既時候，我同心穎分別係男女雙方既戥穿石同姊妹。Kelvin係個叻仔，做住一份響香港地會受「萬民景仰」既i-banker工作，佢搵錢既能力，大概係一班同學之中屬「數一數二」。至於Iris，冇記錯既話應該係佢同公司但唔同部門既同事。簡單一點講，兩個都係高收入人仕，兩個既工作都係忙到核爆。

*****

大半年前某一晚，Kelvin漏夜call咗我出去飲嘢，佢劈頭第一句就同我講：「橋，仆街啦。Iris有咗。」

我一聽，也知道大鑊了。Kelvin同Iris既婚姻，響結婚半年之後，就開始出問題了。他們兩個在人面前，總是會裝出一副恩愛夫妻既模樣，但實情係，佢地兩個響背後已經鬧到關係好僵，平日已經冇偈傾了，而晚上亦已經去到要分房瞓既階段。Kelvin同我熟，這些事情佢早就私底下同我講過。然而人家既家事，誰是誰非，我很難俾意見，但我只能夠講，佢地兩個由認識到拍拖到決定結婚，整個過程大概都只係一年多啲啲，加上佢地兩位都係工作超忙，真正相處溝通既時間，實際上係少之又少，彼此對對方既認識有幾深，一直以來我其實係有一㸃懷疑的。

「Kelvin，兩個問題。」我深呼吸了一口氣：「第一，你唔係一直都話唔想要小朋友架咩？係你諗法改變咗，還是呢舖係意外？」

Kelvin喝了一口酒，搖了搖頭：「我諗法一直都冇改變過；今次對我嚟講，係意外。但對Iris嚟講，well，I am not so sure。第二個問題呢？」

我冇打算詳細追問Kelvin，點解可以匪夷所思地發生「男既覺得係意外，而女既卻係not so sure」既事情，我腦裡面不由自主地出現咗好多不同嘅畫面同假設，不過這些事情，太私人了，即使係老友我都問唔出口。但我卻非常清楚，Kelvin同Iris其中一個鬧得不愉快既原因，就正正係有關生小孩子既問題。Kelvin一向極唔喜歡細路仔，而且係個非常事業型既中環精英，但Iris卻非常渴望生仔，特別係當佢有幾個年紀相若既朋友，都相繼做咗媽咪之後，佢對生孩子既渴求，就更加熾熱。

「又話分房瞓，又話同人冇晒feel…」我皺了皺眉頭：「做乜嘢響呢個時候可以搞到…」

我的話說到一半，也吞回肚裡面了。這個問題，作為男人，其實大家都明白的。Kelvin當然也知我想問甚麼，但他也懶得回答我了。反正我們都是細佬指揮腦袋的動物，某年某月某日，在腦袋和細佬交戰的過程當中，細佬忽然大發神威，贏咗腦袋七個一皮，所謂既「意外」應該就是這樣地發生了。

「打算點樣？」我問。

「可以點樣？」Kelvin苦笑：「生咗出嚟先算囉。」

「咁你同Iris呢？」

「依然係繼續冇feel囉。」Kelvin說：「上個月幾乎諗住搬走，分居搞離婚都要時間啦。依家咁樣搞一搞嘛…唉，等個細路出咗世先算啦。或者BB仔出世之後，Iris同我既關係會改善呢？」

「你真係咁諗？」我喝了一口酒。

「Of course not.」Kelvin搖了搖手上的紅酒杯：「不過Iris應該會係咁諗。」

*****

揸車去醫院既時候，我腦裡面不斷出現兩個畫面。一個，係當日Kelvin響pub話我知，發現佢老婆有咗既情景；而另一個，係幾個月前，婚姻輔導課程裡面，那個「拉布簾」遊戲既flash back。

我響度諗，點解兩個經已即將要結婚既人，對同一個問題既睇法，可以去到「一」同「十」咁大既分別？我心諗，即使兩個人係從來冇認真討論過呢個問題，單憑平日既相處，多少都會sense到，對方響呢啲問題之上既取態，有乜可能可以off到咁遠？還是明知大家響某啲問題上有好大分歧，為咗要結得成婚，所以刻意逃避唔去面對，掩耳盜鈴？人去到咁上下年紀，就覺得自己應該係時候要結婚了，感覺有如大限將至一樣。但係當佢地倉卒決定要同另一半拉埋天窗既時候，佢地其實知唔知道，自己係娶緊，又或者嫁緊俾個咩人？

當日課堂完結既時候，心穎跟我提出咗一個問題，到現在我其實都諗唔通：「其實點解真係會有咁多人，會咁extreme去揀『一』同『十』既呢？instructor明明話，『一』係代表『必定唔生』，而『十』係代表『必定要生』丫嘛…人生到底有幾多嘢，係真正可以由你作主？即使你係非常想生都好，都唔代表你『必定』生得到呀。呢班揀咗『一』同『十』既同學仔，結咗婚之後，萬一事與願違，佢地到底會點樣面對？」

Well，當日遊戲過後，我記得instructor係刻意提醒我地一班準新人，生仔嘅嘢，要切記「唔好強求」的。不過我懷疑，當日有幾多人響揀完「一」同「十」之後，能夠聽得入耳。

*****

泊好車，心穎跟我一起拿著賀禮，走上產科病房探望Iris和BB。

好彩，冇撞正餵奶時間，不過卻撞到Kelvin同Iris既一班同事，佢地帶住一袋二袋既禮物嚟探呢個BB同新手媽咪。

BB安靜地瞓響活動既BB床上面，即使病房裡面充斥住成年人交談既聲音，BB依然睡得安寧。

Kelvin跟Iris，也一貫地以一副幸福恩愛夫妻的模樣，展現在一班親朋戚友面前。一班成年人，像螞蟻摟蜜糖般圍著那張BB床，對這個小嬰兒評頭品足。熱門的話題，是這個BB的那個部份似Kelvin，那個部份又似Iris。

我站在病房遠一點的位置，沒有跟大隊擠向那張BB床。我離遠跟Kelvin點了點頭，示意我來了。

而他呢，活像一個洩了氣的皮球，也許這幾天，真的弄得他太累了。他連走過來打個招呼的力氣好像也沒有，只呆呆的站在BB床邊，勉強地向我報以一個苦笑的表情。

我衷心希望，這個孩子，會為他們兩人的關係，帶來一點曙光…儘管我其實並不相信，一個孩子能夠真正挽救一段婚姻。

Click here to add CK on your Facebook

寫在故事之前

結婚前三個月。

我太太係天主教徒。我地嘅婚禮，亦順理成章地響天主教堂裡面舉行。

香港教區規定，要響教堂裡面行禮，就必須先上佢地所舉辦既婚姻輔導課程。

「呵…欠…」

返咗成日工已經攰到想死，家陣仲要上埋啲講「阿媽係女人」嘅堂。唔瞌眼瞓至奇。

「橋…」心穎用力在我大脾上搣了一下：「醒吓啦…鼻鼾太大聲啦，個instructor睥實你啦…」

OKOK，為咗娶到呢個女仔做老婆，我係可以去到好盡的。現在區區捱幾堂悶到發慌嘅輔導課程，又算得乜呢？

我勉強提起精神，姑且聽一聽，導師有啲咩講係我唔識的。

「我想同大家玩個小遊戲。」instructor說得有點凝重：「跟據過往既experience，每次玩過呢個遊戲之後，通常都會有好幾pair準新人，會選擇取消或者延遲結婚既決定。」

instructor講完之後，一班「學員」即時有點起哄。我心諗，挑，有咩咁架勢呀，一個simple game會搞到原本準備結婚既新人，即時打退堂鼓？心穎用力握了一下我的手：「睇吓我哋結唔結得成婚？」

我做了個「講呢啲！」嘅表情，心諗：「人哋拍拖根基唔穩，俾人篤兩篤，咪甩拖囉。俾人輕輕搞一搞就甩拖，可能都係好事；關係脆弱成咁，結咗婚都唔慌有咩好結果。心穎同我行到今天，我哋足足拍咗十二年拖，一個簡單既遊戲仔會搞得散我哋，我真係俾個頭你當凳坐。」

「麻煩各位學員，男既全部過嚟課室嘅左邊，女既就企晒過去右手邊…」導師如是地說。

「差佬查牌咩…」企我隔離的那位準新郎哥在自言自語，睇得出，佢應該同我一樣，是有點「被迫」來參加這個這個輔導課程的，所以表現得好唔耐煩：「洗唔洗拎埋身分證出嚟呀…」

我向這位「同學」報以一個無奈嘅微笑，然後問：「你arrange咗幾時行禮呀？」

「今年十月。唉，之前都唔知道行教堂要有咁多麻煩嘢搞…」這位同學似乎對這個課程有很大意見：「結婚都已經夠多嘢搞夠多嘢煩啦。想響個church裡面行個禮遮，依家又要屈你嘥幾晚時間走嚟上堂，你估真係唔洗返工咩。話時話，老友，你又幾時呀？」

「遲你些少遮，我book咗十一月。」我輕聲地回答：「算啦朋友，都係煩埋呢幾晚遮。結一次婚反正鬼咁多嘢煩，唔爭在捱埋呢幾堂啦。」

同學回敬了一個苦笑。

我們大約十來對準新人，分開企好之後，導師忽然走到課室的中間，拉出了一道厚厚的黑色布簾。那道布簾，正正就把我們和一班準新娘分開了。布簾背後，這班女孩子在做甚麼，我們完全看不到。

拉出布簾之後，嗰位懶神秘嘅instructor，又從課室嘅一端到另一端，在地板上貼上順序由一至十嘅十個數目字。

「各位男同學…」instructor又再開口了：「依家想大家認真地諗一個問題。」

「你哋各位都就快結婚了。結咗婚之後，你哋其實有幾想要細路仔？有幾想做老竇呢？想與唔想既『程度』，又有幾激烈呢？」

我們呢班「學員」，開始有點你眼望我眼了。

「如果你同你哋既準太太，響拍拖嘅時候，有認真討論過呢個問題，呢個遊戲，難唔到你的。地板上，有十個數字，由一到十。一，代表你婚後完全唔想要細路仔；十，則代表你婚後必定要生小朋友，如此類推。各位同學，依家就照你哋心中所想，企埋去你哋認為最能代表你對自己有『幾想生BB』既數字旁邊吧。」

instructor講完遊戲「玩法」，十幾位準新郎哥就各自走向不同既數字了。我聽完instructor講完遊戲規則，即時想像得到，遊戲既結局會係點樣。布簾既另一面企著十幾個準新娘，setup應該同我地呢邊係完全一樣。佢地同樣會案照自己對「有幾想要BB」呢個題目，從一到十揀出自己既選擇。到大家都企定定之後，instructor將布簾一拉，well，唔想死既話，最好就係，女朋友揀既數字，同你「最低限度」要接近。如果大吉利事一個揀「一」、另一個揀「十」，怕且放學後都有鑊會爆。

我突然之間發現，心穎同我拍咗十二年拖，我哋完來真係從來冇認真傾過呢個問題。讀書既時候，呢個問題跟本唔會響腦裡面出現的，血氣方剛既後生仔，梗係happy咗先算，點會諗後果？婚後想唔想要細路？咁長遠，邊得閒諗？好嘞，到長大成人出嚟社會做事啦，你都只會諗，結一次婚要洗好多錢…擺酒 + 俾禮金 + 租樓…大佬，請恕我目光短淺，我對婚姻既vision，直到呢一刻為止，都只係諗到去，上述既嗰筆數點樣找，再遠啲嘅嘢，我真係未諗過…總之諗住，見步行步，到時先算。

我響度諗，其實係咪我自己有問題呢？

為免有咩「唔愉快」既事情發生，我開始響度估，心穎到底會揀個咩冧把。emmm…我見佢平日，都幾鍾意同啲朋友既細路仔玩，我估，佢應該唔會唔想生的。再講，佢又唔算係對事業有好大野心嗰亭女仔，logical guess佢應該唔會太過介意生仔之後有機會影響佢既career掛。所以，佢點都應該揀something above 5的。如果有把握心穎會揀既冧把，係會between「五」同「十」，而我既目的，係盡量唔好off得佢嘅選擇太遠的話，最保險既選擇，應該係in the middle既「七」。基於呢個「理性分析」，我選擇企去「七」呢個數字既旁邊，靜待拉開布簾既結果。

我以為我既選擇，應該屬於大路既，但原來，呢一班「同學仔」，對是否生BB呢個題目上面，大部份都有非常「肯定」既答案。企響「一」字旁邊既，差不多佔咗一半，剛才同我吹咗幾句水既嗰位同學仔，係其中之一。另外又有兩個「勇士」企響「十」旁邊。而我呢亭企響中間附近位置既騎牆派，忽然顯得好冇性格。

各位同學企定之後，布簾掀開，殘酷既事情出現了。

我即刻望一望心穎…好彩，推測冇錯。佢揀咗「八」，起碼冇off太遠。不過，照佢既選擇而言，佢想要小朋友既「希望」，似乎比我想像中濃了一點。

至於其他女孩子，出乎我意料之外，絕大部份都聚了在「九」和「十」這兩個數字附近。殘酷嘅事實係，揀「九」和「十」嘅女孩子當中，有好幾個嘅男朋友，係好堅決地企響那個無情嘅「一」字旁邊的。

課堂嘅氣氛本來還是嘻嘻哈哈的，但在導師掀開黑色布簾嘅一刻徹底改變了。那些分隔於「一」和「十」既情侶，面上所露出既不悅神色，讓課堂既氣氛變得有點凝重。

這個遊戲之後，導師打了個完場，今晚的課堂就此完結了。我本來覺得，結婚前被逼走來上這些甚麼輔導課程，很多餘，也很浪費時間。但這個拉布簾嘅小遊戲，卻改變咗我嘅諗法。那管我同這個女孩子一同相處了十幾年，有些事情，原來我們真的從來冇認真討論過。

課堂完結，我跟心穎一起走到巴士站。

「你揀『七』…」心穎拖著我的手：「你係估我會揀similar number，所以揀既，係咪？」

「唉，有乜嘢我係可以呃到你既呢？」我苦笑。

「如果你要認真再揀一次，你會揀咩冧把？」心穎問。

「可能係『五』掛。」我說：「講真，我真係從來冇認真諗過。或者咁講，好細個果陣，幻想自己將來個家庭會係點既時候，『夢』裡面係有仔女嘅，但你問我係咪真係好想要，其實呢一刻，我覺得有又得，冇又得。但係如果要有既話，我只擔心是否養得起。」

心穎點了點頭。

「你呢？」我問：「你揀嗰個『八』，係認真還是靠估？」

「算係認真的。」心穎笑著說：「女人嘛，多數都有啲母性的。不過你睇，原來我嘅『母性』都唔算強了。頭先班同學，幾多揀『九』同『十』…」

「係囉…」我說：「都幾surprise。個女既揀『十』，個男既揀『一』，其實都幾大鑊。」

第二晚上課，席上真係少了兩對準新人…兩對在昨晚分隔於「一」和「十」的準新人。

*****

這幾年，見證咗好多破裂嘅婚姻。有啲case，係我發夢都想像唔到，佢地最後會係離婚收場的。婚前既甜密，過渡去到婚後既reality check，今時今日，其實有好多人都捱唔過。

其實，響行入教堂講一句我願意之前，你對另一半既了解，到底有幾多？有幾多人會埋怨，婚後發現貨不對辦，但又已經無從退貨？

跟上次一樣，這個故事，我會「盡可能」嘗試寫下去，但不排除爛尾收場的。

Click here to add CK on your Facebook